Blog

Suider-Paarl Gemeente > Preek-padkos > Preek-Padkos – 27 September 2015

Preek-Padkos – 27 September 2015

Gister se tema by die erediens het gegaan oor God wat ons roep en stuur na mense en plekke toe, soos met die dissipels destyds (vlg Lukas 6: 12 -16 en Lukas 9: 1 – 6). Twee beelde waaroor ons verder gedink het was:

  • ‘n Bootjie: die dissipels het bote geken, en ook Jesus het baie op bote gereis, gepreek, wonders gedoen ens. Bote is ‘n metafoor of simbool van ons lewe: ons hoort nie in ‘n ‘hawe’ of ons gemaksone nie, ons hoort op die see, al is daar golwe! Daarom stuur Jesus ons uit om waar dit soms onveilig voel namens Hom te gaan optree. Die woord ‘apostel’ beteken gestuurde, en dit is ‘n maritime term wat gebruik is wanneer ‘n vloot skepe amptelik uitgestuur is, met ‘n regering se gesag. So word ons uitgestuur as ‘bootjies’ wat soms voel asof ons nie weet waar ons gaan uitkom nie, maar ons weet in Wie se hande ons is!
  • Stof: Jesus sê die dissipels moet die stof van hul voete afskud as hulle teenstand kry. Stof beten doodsheid, alles wat God nie is nie. Die Satan is in Gen 3: 14 beveel om op sy maag te seil en stof tee et. Stof is die simbool van dit wat ons terughou en waar ons soms vashaak om by God se roeping vir ons lewe uit te kom.

Wat was Jesus se oplossing? Bid gereeld, leer lewenslesse uit jou ‘boot’ ervarings, skud die stof af, tree met God se gesag op, leef naby jou roeping!

Daar kom ‘n tyd in jou geestelike lewe, sê Jesus:

  • Besef jy is gestuurde, jy moet beweeg!
  • Doen wat God sê, met jou tyd, met jou finansies, met die gesin wat God aan jou toevertrou
  • Teenspoed gaan kom. Weet dit. Die lewe en mense gaan jou al jou dae gee.

Skud af die stof! Leef en doen waarvoor jy geroep en gekies en gevorm is!

As die Here weer vra: Wie sal ek stuur?

Antwoord dan: Hier is ek Here, stuur my!