Suider-Paarl Gemeente is ’n gemeente wat deel is van die NG Kerk-verband, wat geroep is om ’n ruimte te skep vir gelowiges in en om die Paarl om self Christus se liefde te beleef, en om toegerus en bemagtig te word om dit uit te leef daar waar ons leef of gestuur word.
Die gemeente bestaan uit meer as 2000 belydende en 730 dooplidmate en word tans bedien deur twee voltydse leraars, een deeltyds, sowel as ’n jeugwerker (vir die hoërskoolkinders en jong volwassenes) en ’n kinderkoördineerder (vir die laerskoolkinders), ’n maatskaplike werker en ’n digitale bestuurder.
Suider-Paarl Gemeente het twee kerkgeboue (bedieningspunte), naamlik in Courtrai (net onder die Afrikaanse Taalmonument) en in Klapmuts.
Vakante poste:
Administratiewe Beampte
Suider-Paarl Gemeente het tans ‘n vakature vir ‘n geskikte persoon om as Administratiewe Beampte in die kerkkantoor op te tree.
Dit is ’n voldagpos: Weeksdae 08:00 – 16:00.
Posbeskrywing:
Die geskikte persoon sal ‘n integrale rol speel in die dag-tot-dag werksaamhede van die gemeente met spesifieke fokus op die administratiewe en finansiële aspekte. Die persoon rapporteer aan die Gemeenteraad en werk ten nouste saam met die Voorsitter van die Finansiële Kommissie, die bedieningspan en ander werknemers en belangegroepe.
